صباح الخير ..........أحمد فؤاد نجم

[مازن الطباع]

صباح الخير .. على الورد اللي فتّح

في جناين مصر

صباح العندليب يشدى

بألحان السبوع يا مصر

صباح الدايه واللفة

ورش الملح في الزفة

صباح يطلع بأعلامنا

من القلعة .. لباب النصر

سلامتك يامّه يا مهرة

يا حبّاله .. يا ولادة

سلامة نهدك المرضع

سلامة بطنك الخضرا

سلامتك من آلام الحيض

من الحرمان .. وم القهرة

هَناكى .. وفرحة الوالدة

تضمى الولد يا والدة

يصونهملك .. ويحميهم

يكبرهم .. يخيلهم

يجمع شملهم بيكي

يقرب فرحتك بيهم



صباح الخير على ولادك

صباح الياسمين والفل

يعيشوا .. ويفنوا حسادك

ويسقوهم كاسات الذل

وبلغ .. يا سمير غطاس

يا ضيف المعتقل سنوى

بصوتك دا اللي كله نحاس

صباح الخير على الثانوي

وأهلا بيكوا في القلعة

وياللى في الطريق جايين

مادامت مصر ولادة

وفيها الطلق والعادة

ها تفضل .. شمسنا طالعة

برغم القلعة .. والزنازين

صباح الخير.

[ابو غسان]

أشكرك على المجهود
الرائع والنقل المميز
مع الود والتحية
لروحك الورد وأكثر